"Қошақан" тобында "Тіл - қазынам" үйірмесі бойынша «Нұр - Сұлтан – арман қала» атты ашық ұйымдастырылған оқу қызметі

МКҚК  "Ақбота"  бөбекжайының қазақ тілі мұғалімі Гульнара Кабдылсадыковнаның   жетекшілігімен  "Қошақан"  тобында  "Тіл - қазынам" үйірмесі бойынша  «Нұр - Сұлтан – арман  қала» атты ашық  ұйымдастырылған  оқу қызметі өтті.
Ұйымдастырылған оқу қызметінің мақсаты балаларға еліміздің бас қаласы — Нұр-Сұлтан  туралы мәлімет бере отырып, Отанға, туған жерге деген сүйіспеншілігін арттыру, өз елінің отанын сүйетін патриот болуға тәрбиелеу және сөздік қорларын байыту, есте сақтау қабілеттерін арттыру, баяндап айту дағдыларын жетілдіру болып табылды. Ұйымдастырылған  оқу қызметі  "Көк  тудың  желбірегені"  әуені арқылы басталып, ҚР гимні орындалды. Бүлдіршіндер  көгілдір экран арқылы "Менің елім, менің  Қазақстаным" туралы бейнероликті  тамашалады. Қонаққа әже келіп, алда келе жатқан Тәуелсіздік мерекесімен құттықтады. Балалар әженің тапсырмаларын  қызыға  орындап, Нұр-Сұлтан  қаласының көрікті жерлерімен таныс болды.Туған жеріміз, еліміз  туралы мақал-мәтелдер және өлең шумақтары мәнерлеп айтылды.Сонымен қатар, әр бүлдіршін  Елордамыздың  басты  символы   бәйтеректі салып, әжеге сыйлады. Әже балаларға ақ батасын беріп,өзінің дайындап әкелген тәтті шашуын балаларға ұсынды.Балалардың туған жеріне деген сүйіспеншіліктері арта түсті. Ұйымдастырылған  оқу қызметіне балалар , белсене қатысып қызығушылықтарын білдірді.