1- Маусым Балаларды қорғау күні

1- Маусым Балаларды қорғау күні

         Бүкіл әлемде 1-ші  маусым  Балаларды қорғау күні ретінде аталып өтіледі.  Сондықтан да ол халықаралық мейрамдардың бірі болып саналады.  Бұл күнді тек біздің ел ғана емес 1949 жылдан бері әлемнің көптеген  елі тойлайды. Халықаралық балалар күні – әлемнің түкпір-түкпіріндегі  балаларға қуаныш сыйлайтын мейрам ғана емес, кішкентай балалардың құқығын қорғап, балаларды қорғауға, қолдауға шақыратын күн. Балаларды қорғау дегеніміз – әрбір сәбидің  тыныштығын қорғау, тәтті ұйқысын бұзбау,  алаңсыз күлкісін тоқтатпау деген сөз. Айтулы мереке біздің де елде аталып өтілді. Уәлиханов көшесіндегі «Ақбота» бөбекжайының бүлдіршіндері  де бұл аталған мерекеге қатысып, өз өнерлерін ортаға салды.  Осы күні Аудандық мәдениет үйінің ұйымдастыруымен өткен «Айгөлек» аудандық байқауының финалды кезегіне IV- ортаңғы «Алақан» тобының қыздары  Амангелді Жұлдыз,  Сұңғат  Аяна,  Амангельдина Айзере, Серік Раяна, Жұмат Айзере, Наргужина Асылтас «Испан» биін көрерменге тарту етіп, III- дәрежелі дипломмен марапатталды. Сонымен қатар III-ші ортаңғы   “Қошақан» тобының қыздары Тұрсынхан Балауса, Аманбаева Айзере,  Хасен Сабыржан және  Сейілбек Әлібек «Тәуелсіз ел ұланы» әнін шырқап, II-дәрежелі дипломға ие болды. 1-ші  маусым  Балаларды қорғау күніне орай, Білім басқармасының ұйымдастыруымен өткен бүлдіршіндердің флешмоб биі өткізілді. Біздің бөбекжайдан 16 бүлдіршін  қатысып Исенова Сымбат Толеуғалиқызының жетекшілігімен  «Самғау» флешмоб биі ұсынылды. Әр балабақшадан жиналған балалар  өздерінің дайындаған флешмоб билерінен кейін,  өздерімен бірге алып келген түрлі- түсті шарларды көкке ұшырды. Осыдан кейін барлық балабақшалардан жиналған кейіпкерлер мереке соңында  балаларға көтеріңкі көңіл күй сыйлау мақсатында «Біз кішкентай бүлдіршін» атты флешмоб биін тарту етті. Осындай шуақты жаздың бірінші күнімен келіп жеткен айтулы мерекемен барша балақайларды құттықтаймыз! Әр уақытта аспандары ашық, дендері сау болып, Отанымыздың мақтанышы болуларыңа тілектеспіз!